MIRROR丨呂爵安參與構思《油麻地莎士比亞》MV情節　Edan透露盼日後做導演

MIRROR成員呂爵安（Edan）的E式情歌每次都帶來驚喜，而今次新歌《油麻地莎士比亞》，便驚喜地與創作團隊製作一個很貼地、充滿港式情懷的MV，不過更驚喜（還是驚嚇？）是歌名無意中提早劇透，就連Edan本尊都嚇親，不過幸好未有影響其他細節。

另外，Edan這次有份參與構思MV畫面，事後更坦言希望日後能親自執導MV。

12怪盜｜MIRROR成軍5年首部電影各懷絕技　姜濤因1事惹隊長不滿？【有片】

▲ 楊偲泳當Edan新歌《油麻地莎士比亞》MV女主角。

Edan一時大意認失策

如果有留意Edan個人IG都會一早知道其新歌歌名叫做《油麻地莎士比亞》，Edan回想這事也自覺失策，說：「喺錄音最後一日，好興奮想同大家Share劇透少少，影咗歌詞Share Story，點知Post完好快就見到有人講《油麻地莎士比亞》，我都即刻嚇親，究竟乜嘢事？點解講咗歌名？然後都肯定自己唔小心Post咗出嚟。」

Edan自爆歌名後，本想過刪除Story，但都知已太遲了，更說：「反正都Seven咗，咪俾大家知道囉！其實都冇乜所謂，係命運安排先發生咗呢件事情。」

李俊緯作曲黃偉文填詞

說回歌曲，今次再有《E先生連環不幸事件》的班底：溫瀚文加上李俊緯作曲，黃偉文填詞、Edward Chan監製參與，Edan形容是一個很神奇的合作，他說：「Edward搵啲作品返嚟，通常我都唔會知邊個作，純粹聽Demo 俾我感覺，同埋Base On 旋律，係去到好後期先知溫瀚文有份寫，所以都好Surprise，因為《E先生》之後都冇唱過佢寫嘅嘢，所以一知係Raymond寫，就覺得好奇妙，有一種Connection喺度。」

歌詞方面，Wyman這次也寫了一個很有意思的題材，Edan十分喜歡，他回憶歌詞誕生過程道：「我同Wyman、Edward有個Group，俾咗Demo Wyman聽之後，某日佢話諗到條橋，叫我聽下鍾唔鍾意，條橋就係《油麻地莎士比亞》。」

而歌詞概念，其實就是講述一個中文水平很低的男生，每日都寫一首詩送給喜歡的女生，大眾可能會覺得男生寫的內容很奇怪、字體核突，用字又唔夠靚，但其實這已是男生認識的字裡面最靚的用字。歌曲想表達誠意同心意，比出來成品有多好來得緊要。

每日寫愛的短訊

Edan透露，其實自己過去都試過用類似方法追女仔，回憶道：「求學階段試過想追一個女仔，有一個好好朋友嘅中文補習阿Sir就教我每日寫篇文俾對方，佢話自己都係用呢招，用誠意打動咗個女仔，叫我不如都試下，咁我都每日Send Message，打篇文俾佢，都持續咗百幾日，但最終係失敗咗。所以聽完Wyman講，都覺得現實中真係有男仔會咁做。雖然呢件事唔一定Work，但就好Sweet。」

不過，Edan亦提示大家：「呢招唔可以亂用，有時有啲嘢冇得夾硬嚟，係真係打動緊人還是煩緊人，兩睇。」

因為歌曲背後的有趣想法，來到MV裡，Edan變身成為了茶餐廳外賣仔，他喜歡了一個經常嗌外賣的女生，而故事就由這裡展開。

Edan表示：「角色塑造成貼地啲嘅男生，但鍾意一個藝術少少嘅女仔，想追佢，於是用佢唔擅長嘅方法，就係寫詩寫字，寫得好核突好奇怪，但用心意誠意打動佢。」

呈現港式情懷

為呈現這個充滿港式情懷的故事，MV裡設計了很多可愛的畫面，說：「裡面有啲好可愛嘅畫面，例如放到成枱外賣盒，要諗寫啲乜嘢俾佢，喺茶餐廳練習點樣喺高級餐廳向對方表白，寫喺手掌向對方表白等等，呢啲都係好可愛，又青春又貼地嘅故事情節。」

其實MV裡一些有趣的畫面，Edan都有參與構思，他解釋道：「今次參與度又比以往多少少，因為同導演已經合作過好多次，好多謝佢哋願意俾我去嘗試一啲我想像、覺得可能好睇嘅畫面。老實講，我冇學過任何有關導演嘅嘢、拍攝上嘅嘢，但係入行耐咗，漸漸地會有啲想法，平時冇機會嘗試，今次可以即席創作。佢哋都會俾專業意見話俾我聽可唔可以，然後再試。」

坦言有意當導演

Edan坦言，都唔肯定出來效果如何，但這是難得的經驗。那麼日後可會嘗試做導演？

對此，Edan回答道：「都有咁嘅念頭，但我未必係一個可以由零開始生一嚿嘢出嚟嘅人，我比較鍾意喺有條橋嘅情況下，喺上面再生啲嘢出嚟。如果有機會，我都想第時有隻歌我真係同佢哋一齊玩，但係我做導演的話，大家從旁幫助我，都希望日後有咁嘅作品，因為平時都冇咁嘅機會嘗試，自己MV就可以自肥試吓！」

最新影片推介：炎明熹專訪

HKET App已全面升級，TOPick為大家推出一系列親子、健康、娛樂、港聞及休閒生活資訊及影片。立即下載︰https://onelink.to/f92q4m

追蹤TOPick Whatsapp頻道睇最新資訊︰http://tinyurl.com/3dtnw8f5